Хөгжим заслын хөтөлбөр

Бага насны хүүхэд хэл ярианаас гадна нүүр царайны хувирал, хөдөлгөөн, тоглох, зурах, дуулах, бүжиглэх зэрэг үйлээр өөрийгөө илэрхийлдэг. Хөгжмийн аялгуу болон хэмнэлийг сонсоод хүүхдийн сэтгэл сэргэж, жижиг булчин хөгжиж, энгийн хөгжмийн зэмсгээр тоглоход нүдний хараа болон гар, хурууны хөдөлгөөний зохицуулалт сайжирна. Мөн дууны утга үг, аяыг сонсох, сурах явцад хүүхдийн ой тогтоолт, сэтгэн бодох чадвар хөгждөг. Зэрэг дуулж, зэрэг хөгжимдөх, зэрэг дуусгах болон жүжиглэх үед хамтран хийж, хөгжмийн зэмсгээ хуваалцах зэргээр багшийн заавар дохио болох командын дагуу дүрэм журмыг дагана.